«Ливонские обременения» и русско-ганзейская торговля в преддверии ливонской войны - Марина Борисовна Бессуднова Страница 33

were ungetwifelt, wenn gelick desse Stede sich sollicher Segelationn affdedenn, dath dardurch, diewile die Lifflendischenn Stede unnd anders uth Engelandt, Hollandt, Preußlandt, Dennemarckenn, Schwedenn, Polenn unnd Lettouwenn die fhart unverhindert darhenn heldenn, dem beschwertenn Lande nicht mith dem weinigstenn gedienet noch gehulpenn were unnd wurdenn dennoch disse Stede ane jenige frucht des deels narungloß sittenn, jedoch wo dem allenn ock unangesehenn, dath in sunderheit die van Lübeck sich Rußlandt mith ohrer handelung unnd kopmanschop ock inn öffentlicher veyde twischenn denn Russenn unnd Lifflendischenn nicht thoentholdenn vann denn vorigenn herrn Meisternn hochlofflicher gedechtnuß stattlich privilegieret unnd begnadet. Welche Privilegia disse Erbarnn der Stede Gesandten vorlesen gehortt. So woldenn dennoch die Erbarnn Stede unnd die van

(28/8, fol. 36v.) Lübeck mith jedoch dem itzigenn ohrem Privilegio hernachmals unvergriplich dem beschwertenn Lande tho hulpe unnd tröste, so ser die herr Meister by den hochgedachten Kunnigenn unnd fürstenn, dath sich ohre Undersaten der Segellationn up Wyborch affdedenn, konden beschaffenn unnd befurderenn, des ock dissenn Stedenn gewissenn thoverlatigenn bescheidt tho schickenn, sich in deme och geburlich unnd gelickforung holdenn.

Hirjegenn hebbenn die Fürstlichenn gesandten na geholdener thoruggespracke unnd korter repetierung wedderummb angetoeget, dath sie vele eine andere unnd tröstlicher anthwurtt als denenn so sie Christenn unnd frunde, welchs ock an dem erbarmlichenn thostande des bedroevedenn Landes kheinn gefallen droegenn erachtet vermodende gewest, diewile genochsam vermercket wordenn, dath ohre gnediger Herr ann dem des erclerung vann ohnenn begert allen meschlichenn unnd megelichenn flyt by der Key. Mayte unnd velenn andernn konnigenn unnd Potentaten vorthowendenn nicht underlathenn, des ock noch inn daglicher arbeydt stunde, dath averst darup sobalde die vorthoffentliche endtliche bescheidt nicht erfolgede; were woll thoerachtenn, dath die lettinge ann dem, dath so vele hoge heupter nicht sobalde inn ein thobringenn, welchs ohrem gnedigen Herrnn thom hogstenn beschwerlich. Eth weren ock die bedroevedenn Lande dardurch nu so wyt geradenn als ogenschynlich, doch stundenn sie inn hopeninge, diewile nu die herre Cumpthur vann Düneborch umb hulpe unnd bystandt aldar embsiges flites angeholdenn, dath nhumehr die Key. Mayt unnd dath hillige Ryke sich einer trostlichenn beharlichenn hulpe wurden ercleret hebbenn, unnd wowoll die Erbarn

(28/8, fol. 36r.) Stede sich hörenn lathenn, dath sie dartho ohre gebuer ock gerne donn woldenn, so wurde doch sollichs langsam thogaenn unnd die vertoch denn bereidt altho sehr beschwerden landenn noch mehr beschwerlicheit unnd denn endtlichenn undergang geberenn. Werenn derhalvenn instendiges flites upt högeste frundtlich sinnende, dath die Erbarn Stede sollichem unrade vorthokamenn ohrem gnedigenn Herrenn eine ansehenliche Summa geldes up genochsame Caution, dath sie die Keiserliche Penningmeister wedder solde erleggenn unnd bethalenn mochtenn verstreckenn unnd thostellenn, wo der lofflichenn Stede vorfarenn wolt eher gedaenn, unnd nhu nicht fast rhumlich anstaenn wolde, wenn die eine Christe vann dem andemn also troestloß solde verlathenn werdenn, die Christliche leve, welche die eine dem andernn inn nodenn schuldich wurde, darmith ock nicht ertoget.

Der Segellation halvenn up Wyburch kondenn sie denn Erbarnn Stedenn nicht verholdenn, dath ohre gnedige herre umb Verhinderung willenn der thofhor die kunnige tho Polenn, Schwedenn unnd Dennemarckenn mith mehr anderenn Potentatenn frundtlich unnd flitich ersuchenn lathenn, hopedenn ock, dath dardurch denn fiendenn allerley thofhuer solde gesperret werdenn, sonderlichs jo inn Dennemarckenn, daruth mann bereidt ohme dath allergeringeste nicht thoschickede, Uth Schwedenn konde dergelickenn ock woll geschehenn, went nicht die thofhur uth dessenn Stedenn dede. Und were thobedenckenn, wath der gemeinenn Christenheit hirann gelegenn, weß vann

(28/8, fol. 37v.) Privilegienn angetagenn wordenn. So werenn diesulvenn nicht tho verderffe unnd underdruckinge der Christenheit, Lande unnd Lude gegevenn, sondernn weren sollichs falles billich upthohevenn unnd thocasserenn. Unnd woldenn sollichs aller wo gemelt denn Erbarn Stedenn mith sampt der allerhogestenn nodt der hochbedrovedenn Landenn tho Lifflandt inn günstig unnd Christlich bedenckenn heimgestellet hebben mith erbedunge etc.

Als nu die Geschickedenn hirmith enthweckenn unnd die herrenn Radtsgesandtenn solliche anthwurt nicht alleine jegenn ohre billiche erbedenn undanckbar, sondernn ock sunst allenhalvenn fast verdretlich vermercket, insonderheit wile die vertrostede hulpe denn beidenn Stedenn uth guthhertziger meynung gedaen gar mith stillschwigenn overgegangenn. Hebbenn die herrenn Radtsgesandtenn sollichs, wo billich tho gemute gefhuret unnd dem herrenn doctor van Collenn na notturfft unnd der gestalt, wo verursachet, anthwurt darup thogevenn bevalenn, wo denne nach der lange mith verhalinge aller unnd jeder artickell unnd dem endtlichenn beschlute, dath die Erbarnn Stede sollicher ohrer anthwurtt vor der Key. Maytt dem gantzenn Romischenn Ryke unnd allenn Stendenn, sonst ock vor jeder menniglich woldenn bekandt synn, unnd derwegenn mith denn wordenn als gehöret billich verschonet werenn, ock dath sie diesulvige ohre anthwurtt na aller gelegenheit dißmahls nicht musten thoenderenn.

(28/8, fol. 37r.) Geschehenn derwegenn dann die Gesandten, dath die Erbarn Stede alles willenn tho gude holdenn. Sie heddenn, wes so geredet, nicht anders dann im besten unnd als idt die notturfft unnd umbstendicheit der sachenn erfurdert gemeint angetagenn. Weß man sich der Erbarnn Steder Riga unnd Revell halvenn erbadenn, nhemenn sie tho dancke ann, woldent ock benevenn dem andernn ann ohrenn gnedigenn herrenn gelangenn lathenn, die wurde idt ungetwifelt mith allenn gnadenn ock erkennenn. Unnd sint darmith affgetredenn.

Namiddages tho dren schlegenn iß ock der Erbarnn Steder Riga unnd Revell Gesandtenn durch denn herrenn doctor vann Collenn desse bescheidt gegevenn, dath die herrenn Gesandtenn ohre gedane erclerunge up der Steder vorgeholdenn bedenckenn vernhamenn, diewile sie sich denne thom deele up die verhandelung des jares 51. thom deele ock up denn Receß anni 40 dedenn refererenn. So heddenn sich die herrenn Gesandtenn uth sollichenn Receß unnd handlungenn der gelegenheit erkundet unnd befundenn denn bescheidt ungewyß unnd twivelhafftig, ja mehr affschlaglich dann thoverlatich. Nu muste desse sache einenn rechten wissenn unnd vhastenn grundt hebbenn, damith kunfftigem wedderwillenn unnd fernerer disputation vorthokamenn, derwegenn heddenn die Erbarn stede eine schrifftliche vernothung, wo idt eigentlich darmith thoholdenn stellenn lathenn, diesulve solde

(28/8, fol. 38v.) mann ohnenn anergevenn der Erbarnn steder meynung daruth thoersehenn. Wo nuhnn solliche schrifft ohrenn oldestenn unnd ohnenn gefallenn wurde, als die Stede nicht anders woldenn hapenn unnd die Stede des eine gewisse versekerunge durch besegelde urkunde bekamenn kondenn. So heddenn sie sich dermathen ercleret, dath sie inn dussem ohrem anliggenn unnd bedruncke mith einer vermugelichenn hulpe kondenn